Muyeres

País Malva

22 de febrero 2019 20 horas
Valey Teatro
Entada: 10 euros
Venta anticipada: 7 euros
Venta de entradas en la taquilla de Valey Centro Cultural el 22 de Febrero de 17 horas hasta comienzo de función y en www.valeycentrocultural.org desde el 18 de Febrero

País malva ye un paisaxe sonoru afitáu nes grabaciones de los primeros etnomusicólogos que documentaren la música tradicional asturiana a mediaos del sieglu XX. Cola reinterpretación d’esti patrimoniu musical, queremos rendí-y tributu a Kurt Schlindler, Alan Lomax, Constantin Brailoiu y Manuel García Matos; toos ellos pioneros nel importante llabor de tresformar en tanxible una herencia cultural hasta esi momentu intanxible. Tomamos 1952 como un añu de referencia nel que se cruciaron nel territoriu asturianu estremaos investigadores, faciendo trabayos de campu que recoyeron de voz del pueblu, documentos sonoros que formen parte imprescindible del Patrimoniu Cultural Inmaterial de la Humanidá.

Dende l’Asociación Música Tradicional Muyeres, proponemos una nueva llectura d’estos trabayos (testimonios sonoros que, en munchos casos, apaecen venceyaos a la muyer), col aquel de revisar un pasáu entovía reciente que forma parte de la nuestra memoria.Nun queremos remembrar grandes xestes sinón, más bien, evocar les buelgues, los posos y los restos sonoros que pervivieron hasta los nuestros díes.

Entrugámonos ¿de qué hai memoria?, ¿de quién ye la memoria? La rempuesta alcontrámosla en nosotres mesmes, muyeres del sieglu XXI, activistes de lo cotidianu que cuestionamos la tradición del llugar onde ñacimos y que mos semó canciu a canciu, nota a nota, nuna sinfonía demasiaes vegaes murnia. Al traviés de los documentos sonoros que revivimos, únicos ya irrepetibles, reivindicamos la memoria como un campu de resistencia, un llugar poliédricu y, sobremanera, común.

Un país d’igualdá d’oportunidaes que pintamos de malva. ¡Queremos observar d’ónde venimos y pa ónde vamos!, ¡queremos tresformar la nuestra mirada, la nuestra acción, el nuestru discursu!, ¡queremos suañar espacios y ocupar territorios!, ¡queremos facer de la nuestra memoria y de los nuestros recuerdos fuercies renovaes!

Nel añu 1993, y coordinaes por Lisardo Lombardía, muyeres procedentes de dalgunos de los grupos d’investigación etnográfica más destacaos – Andecha Folclor d’Uviéu, L’Aniciu, Escontra’l Raigañu, Xurgar nas Costumes y Concetsones – formen el Colectivu Muyeres. Lo que nun principiu yera reivindicar la bayura de la música de percusión del país y el papel de la muyer como protagonista y depositaria de la tradición musical asturiana, tornose nuna de les aventures musicales más apasionantes de los últimos años. Porque amás de les sos impecables y emocionantes grabaciones – Muyeres , Dancies, bailles, ramos, romances y cantares de los conceyos d’Asturies (FonoAstur, 1993), Muyeres II (FonoAstur, 1997), Pasamentu (FonoAstur, 2001) y Onde la culiebra canta (FonoAstur, 2006) -, caúna d’éstes teníen el reflexu d’un espectáculu nel que s’entemecía tola potencia de la tradición más pura cola maxa del ritu. Porque si daqué vien de les grabaciones de Muyeres, y pendarriba de tou de los sos espectáculos en directu, ye esa verdá ablucante que tien lo que naz no fondero la tierra.